رحلة الي قرية جزي
بتارخ 12-9-2008 يوم الجمعة
قمنا - فريق الحالات - في مشروع الصيدلية الخيرية
بزيارة الحالات المريضة في قرية جزي والتي نشرف ونتابع علاجها بصورة شهرية
,,, كانت لحظات صعبة ,,, مش عشان الحر والصيف والصيام
لكن كان صعب نشوف الناس دي ,,,
البيوت هي غرف تقريبا زيها زي الشارع !!
الاثاث هو قطع محدودة تعد على اصابع اليد الواحدة
الثلاجة ليست لحفظ الطعام
انما لحفظ الدواء
فبجانب الفقر هناك المرض ,,
رأينا انواع كثيرة من الامراض
لكن معها رأينا رضا وراحة وطيبة قلب وكرم وشهامة وعزة
.......................
الناس كانت بتقلنا : انتوا جاين في رمضان عشان ماتضيفوش ؟ لأ ماينفعش انتوا هتفطروا معانا ..
الواحد كان مستغرب !!
لما نفتح تلاجاتهم عشان نشوف الدوا (كمتابعو واشراف على علاجهم)
نلاقي التلاجة فاضية !!
طب سؤال هم عايزين يفطرونا ,,,,, طب هيفطرونا على ايه ؟؟؟!!
طب بلاش دي هم ناوين يفطروا ايه اليوم ده !
مجاهزين ايه ؟ ولا هيجهزوا منين ؟
--------
بجد الواحد بعد الزيارة دي مش عارف يأدي حق نعم ربنا عليه ازاي ؟!
في ناس حوالينا حياتهم صعبة جدا جدا
وواجب علينا كلنا نأدي حق نعم ربنا علينا ونساعد الناس دي
وزي ما شخنا الشعراوي كان بيقول : لما تشوف واحد فقير وغلبان ,, اعرف ان فيه واحد غني واكل حقه !
لأن ربنا عدل
لازم نؤمن انه سبحانه هو العدل
لا يظلم عباد
يعطي نعمه علينا جميعا لكن ربما باختلاف
فهذه صاحبة جمال ولكن فقيرة
وتلك صاحبة مال ومكانة ولكن ليست جميلة ..... وهكذا
وكما كان من الطبيعي وجود فقراء
فرض الذكاة والصدقات على الاغنياء
لكي يعيش الناس تحت عدل الرحمن في رضا وقناعة وسعادة .
-------------
انا مش هحكي قصص وحياة اهل جزي الطيبين
بس هفرجكم على صور من القرية
بعيد عن البيوت من الجانب الاخر للقرية ناحية الترعة والشجر
عشان مانصورش بيوت الناس وحرماتهم ..
بلد بسيطة بس جميلة
